POETRY IN FROZEN MOTION (LITRATULA)

Antay Salakay

2011-09-29T19:08:00.006+08:00

Taon, Linggo, Araw, Oras

Ilang sandali na nga ba ang lumipas?

Sa pag-aabang ng tamang panahon,

Upang sa inip na nadarama ay umahon.

Pagdating ng araw na pinapanaginipan,

Pagkawala ng oportunidad hindi na hahayaan

Paghihirapan ito at papahalagahan,

Tagumpay na nais ay pagpupunyagihan

Ngunit habang hindi pa ito dumarating,

Biyaya sa araw-araw ay siya na lang ang bibilangin

Hindi panay hinaharap ang hinahanap,

Dahil ang kasalukuyan ay may makikikita pa ring sarap.

Lahat naman ay may oras na nakatakda,

Sa pag-aantay ay huwag tuluyang masuya

Darating din ang araw ng iyong pagsalakay,

Patungo sa lugar ng minimithing tagumpay.

Photos and words by: jeklog

@ Lucban, Quezon

Guhit Kamay

Guhit Kamay

2011-01-24T01:13:00.007+08:00

Paikot, Pahaba, Kanan, Kaliwa

Saan man dalhin ng gabay ang aking pluma

Panimula’y tila yata walang saysay

Nang maglaon ay makikita gandang taglay

Ihambing ito sa buhay na kinabibilangan.

Mga pinagdaraanan natin parang walang patutunguhan.

Bungkos-bungkos na tanong at pagaalinlangan,

ating ibinabato sa may Kapangyarihan.

Pero ika nga nila, lahat talaga ay may kadahilanan.

Pananalig sa Maykapal lamang ang kailangan.

Sa bawat liko at pangyayaring sa atin nagaganap,

ay mabubuo ang plano ng Diyos sa hinaharap.

Tiwala lang sa Kanya ang paniwalaan ng higit,

Sapagkat may rason ang lahat ng kanyang iginuguhit.

Sa papel mong buhay, kamay ay pasikot-sikot

Di magtatagal and tunay na ganda nito ay iyo ring mapupulot.

photos and words by: jeklog

@ Morayta, Manila

Have you ever felt this sudden urge to ask God what the hell is He doing in your life? That you want to cut the chase to see what really is bound to happen to you? Is what you are doing now, something essential to your destination? Or you are just shilly-shallying instead of being the next best thing? When is your time to be on top? Are the twists and turns that you are feeling going to lead you somewhere or at the end they are just going to make you throw up? That you want to pirate a copy of your life’s walkthrough so that you can get everything that is fated to be yours? So many questions about our life and our Guide fill our minds. As of this moment, I too do not have the answers to these queries. Perhaps the thing that will de-clutter our minds with these schemes will only be Trust in the Him, the Guide.

Silid Aralan

2011-01-14T11:50:00.013+08:00

Nene, Totoy, Tinay, Nonoy

Maupo na ang lahat, andito na si kuya Buboy

Naihanda niyo ba ang inyong takdang aralin?

Mga bagong leksyon ngayon ang ating tatalakayin.

Makinig at itatak sa utak niyong kuwaderno

Mga mumunting aral at maikling mga kwento,

Na sana’y mamalagi sa mga kukote ninyo,

At magbigay dunong sa gutom na ulo

Magkaroon sana ng saysay aking krusada,

Maghatid karunungan aking adbokasiya.

Kapos man sa gamit at teknolohiya,

Aking tinig na lang ang gawing pisara.

Ang amin mang silid ay mismong kalsada,

Ang aming napag-aralan ang siyang mahalaga.

Pormal na edukasyon man kami ay pagkaitan,

Ay may mga puso paring may dalang paraan.

photos and words by: jeklog
@ P.Noval St., España, Manila

Class Room

As I was navigating my way through River Espana in the hunt of the elusive “Belly of the Beast” (Isaw), my comrade pointed towards an unlikely vista. With high hopes that we can finally harpoon this monster of a street meal, I saw something else. A flock of juvenile Juans and Marias seated contentedly along the outskirts of the boulevard has stolen my sight. I approached them as I took blurred shots of the group. I sparked a conversation with their mentor named “Buboy” and asked permission to have better shots of them. I luckily had a few subpar shots, enough to hotwire my imagination and tell their story my way. These are the moments that I am constantly reminded of how privileged I am to have formal education. I keep on wining about hardships in schools before well in fact, I was fortunate enough to be in one. Comparing myself to these children, I suddenly realized that they are not that ill-fated as I thought. They had their Kuya Buboy to be their “Master Splinter” that will guide them through the things that matter in life. Short stories and essential lessons that will make a kid survive through adulthood are transferred in this fractional encounter. I cannot help but give my thumbs up to the “Efrens” of the street, more so, the “Buboys” who have yet to be even noticed and commended to accomplish a noble job well done. As long as we have them, classrooms will not just be a term described in terms of being a room where classes are held, they will be turned in to places that have enough room to have a class.

Larawan ng Palaruan

2011-01-07T10:33:00.020+08:00

Bata, Matanda, Dalaga, Binata

sa lugar na ito lahat ay nakikita,

tipunan ng samu't saring tao

hiyawan sa bawat pukol at bato.

paligsahan sa lansangan ng halo-halong kabataan

samahan mo pa ng magugulang na may katandaan,

kadalasang kinararatnan ay hamunan at pustahan

pakatandaan na ito'y isang laro lamang at di seryosohan.

Simpleng saya ng tao ay di matatawaran

pagiging mababaw ay di' dapat pulaaan

kung minsan nga ay mas ramdam pa ang ligayang totoo,

sa mga bagay na payak at di komplikado.

Kung tutuusin ay ganito dapat ang larawan,

ng tunay na pook palaruan

lugar para magpakabata at makipag tawanan

ng walang pag-iimbot at alinlangan.

photos and words by: jeklog
@ San Ildefonso, Bulacan

It will always be a common thing to see “half courts” or half of a basketball court installed ingeniously in every corner of a typical Flip alley. People gather around these places not primarily to show their ball handling or shooting prowess, but most of the time, it is all about having fun. The spirit of competition is a given in street culture but beyond this, is the genuine aim to have pure and uncomplicated fun. This is the kind of enjoyment that the “now” generation fails to appreciate. Everything seems to be so governed by the online armada of social networkers that we forgot how real social networking ticks. Gone are the days that the bliss of being physically in a group and spending time with each other in the streets is the way to go. Now, the information super highway that is The Internet, is our street. Back then, “shout outs” literally mean “to shout out” and the perfect place to experience this is the Half Court. The sudden gush of emotion to up your team’s morale or to destroy the opposition’s ego is the meaning of “shout out”. As a street-eye, I would like to take more photos of these subjects. Is it just me being of age? Or do I just miss the good old days when the perfect picture of fun is to play ball with a bottle of “Pop Cola” on the line?

ELeksyon

2010-05-12T12:42:00.002+08:00

Plataporma, Progreso, Ginhawa, Proyekto
Mga pangakong binitiwan ng mga kandidato
Lahat ay bibigyang saysay sa araw na ito
Sa araw na ang taong bayan ay boboto.

Maagang gumayak patungo sa presinto
para subukin sistemang makabago
Ngunit pagdating eh, pila'y di matanaw ang dulo
Kaliwa't kanan ay nag-aalburutong tao

Humanay, umupo, nainip, nagpaypay
Tiniyagang mag-antay hanggang balota'y mapasakamay
Kodigo'y inilabas, panulat na itim dali-daling ikinaskas
doon sa loob ng bilog, iningatang hindi lumagpas

Ilang minuto'y nakaraos na rin sa wakas!
nakapili na rin ng mga lider at mambabatas.
Pagsubo sa PCOS dumating ang oras,
sana naman ay tanggapin at hindi ilabas

Papel ko'y ipinasok sa bunganga ng makina
aba'y mantakin mong iniluwa ng pesteng walanghiya!
Sinubok muling ipakain makalawang pagkakataon,
Salamat Lord at ang mensahe'y congratulations! *whew

Nawa'y eto na ang simula ng pagbabago
sana naman mga politiko'y maging totoo
Sana kahit papano'y may nakuhang leksyon
Ngayong panahon ng automatikong eleksyon.

photo and words by: jeklog
@ Pacita Elementary School, San Pedro, Laguna

TalamBuhay

2010-03-25T16:08:00.003+08:00

Tsismis, Ekonomiya, Krimen, ATBP...
Iyong makikita sa paglipat ng mga pahina
nitong babasahing parte na ng araw mo
ibinebenta sa bawat sulok at kanto

Munting librong laman ay mga bagong istorya,
na matapos ang 24 oras ay agarang luma na
Naghahatid ng mga balitang katuwa - tuwa,
ang iba nama'y mapipilitan kang mapaluha

Ang ibang seksiyon ay magsasabi sa iyo,
estado ng bansa, pagpapatakbo ng gobyerno
Ang ilan pa ay magpapainit ng dugo't ulo
Sa ngitngit at galit o dili naman sa mapaglarng konteksto

Ito ang talaan ng bawat pangyayari
mga kwento ng buhay maliit man o malaki
Kulturang nagsimula pa sa panahong di na maalala
bahagi na ng buhay ng mayaman man o ng madlang masa

photos and words by: jeklog
@ Dapitan St., Manila

Kampanyero

2010-03-24T16:45:00.003+08:00

Progreso, Pagbabago, Sipag, Talino
Mga pangako at katangiang iiwan ko sa inyo
Pero bago ninyo makamit ang mga ito,
ay dapat munang pumalagay sa akin sa A'Diyes ng Mayo

Ibubuhos ang lahat ng pera, pagod at pondo
sa pag-iikot sa iba't ibang mga bario at sitio
Makuha lang ang kiliti at tiwala ninyo,
at matiyak ang aking pagka panalo

Nakapako sa bawat poste at puno mukha ko
ngiting walang kasing lawak at amo
Nagsasabing ako ang nararapat na iboto,
dahil ako ang sagot sa pag ginhawa ng buhay mo

Ganito ang itsura ng bawat kandidato
ituring mo raw na kaibigan, kabatak, kompañero
Pero matapos ang kampanya at maluklok sa puwesto,
tapos na rin ang palabas at maihahayag na ang tunay na pagkatao

Metro Gwapo

2010-03-21T17:36:00.004+08:00

Kisig, Tikas, Yabang, Angas
Sa aking pagkakatayo dito, nooý nakataas
Paniniwala sa sarili sobra sa lakas
Pagtingala sa akin ng iba tila ay likas

Eh anong paki ko kung hindi ako macho?
Madadala naman to ng itsura ko,
Kilabot ako ng mga babae sa kolehiyo
kaya mga nanay ingatan ang mga dalaga ninyo

Oo, hayag naman na di ako artistahin
pero pagkalugod sa sarili ay sa iyo lang manggagaling din
Pagtanggap kung sino at ano ka talaga,
ang siyang may saysay at halaga

Huwag mong hayaang paligid ang mag sabi sa iyo
na ikaw ay hindi sapat at di simpatiko
Tanggapin ang sarili at magpasalamat na ikaý kumpleto,
Ikaw ay mabikas na nilalang, ang natatanging Metro Gwapo.

photo and words by: jeklog
@ Arlegui St, Manila

Kupas na Oras

2010-03-16T08:57:00.004+08:00

Minuto, Segundo, Noon, Ngayon
Walang sing bilis ragasa ng panahon
Ang kani-kanina lang ay pagkabukas na'y kahapon
Ang akala mong kailan lang eh noon pa palang isang taon

Di namamalayan pagdaan ng mga bagay bagay
Isang saglit ay pangarap maya maya'y iyo nang taglay
Ang dati namang kayang gawin ng walang kahirap-hirap
Ngayon oras sa paggawa sa mga ito'y hindi na makahanap

May mga panahong nais mo nang balikan
saya, tuwa at kapayakan ng kabataan
Pero nang magbalik ulirat mula sa alapaap,
ay bigla rin ang muling pagharap sa hinaharap

Lasapin ang bawat sandali ng buhay na kumakaripas
Huwag magmadali sa iyong pagtahak ng landas
Dahil ang mga nakaligtaang namnamin na oras
Iiwan ka ng walang bakas at sa memorya'y kukupas

photo and words by: jeklog
@ Laon Laan, Manila

BibiTiwala

2010-03-13T10:21:00.003+08:00

Sabit, Kapit, Paghawak higpitan
konting tiis na lang at mayroon nang makakamtan
Lahat ng bagay na iyong pinaghirapan
ay may katapat din na pabuya sa katapusan

Ang akala mong sakripisyong walang hanggan,
di maglalaon swerte ay ikaw din ay aabutan
Siguro nga panapanahon lang yan
marahil di mo pa oras para sa kaginhawaan

pero minsan di mo maialis na mapanghinaan
lakas ng loob tila nawawalan
Kasi iyong ginagawa parang walang pupuntahan
bawat araw na kumikilos patungo sa kawalan

Tiwala lang siguro at pananalig
doon sa Taas na una sa ating umibig
Buhay ipagpapatuloy at hindi bibitiw
buhay ay sasayaw din sa tamang saliw

photo and words by: jeklog
@ Ayala Bridge, Manila

Positibong Anggulo

2010-03-04T17:45:00.002+08:00

Pasakit, Pagsubok, mga bitbit at himutok
dito kadalasang atensyon nati'y nakatutok
Gulo at pasanin palagiang nakikita
nitong minsang bulag nating mga mata

Pagsulyap sa buhay tila kay dilim
na parang may oras na di na kayang maatim,
Pero nasubukan mo na bang mayroong baguhin,
ibahin ang pokus ng iyong pagtingin

Na sa bawat pagdurusa ng iyong nadarama
sana rin ay may kagandahan kang napupuna
na sa gitna ng basura mong nakikita
may pag-asa pa rin palang nagbabadya

Minsan kaligayahan ay nasa atin lang din
Kung hindi lang ang pangit ang bibigyang diin
paglaanan ng kahalagahan mga nagpapasaya sa iyo,
sipatin ang buhay sa positibong anggulo

photo and words by:
jeklog @ Binondo, Manila

Balang Araw

2009-11-15T16:43:00.003+08:00

Giyera, Pinsala, Digmaan, Karahasan
Palitan ng putok tila walang katapusan,
Palagay niyo ba'y may kararatnan?
itong away na salat sa katuturan.

Di pagkakasundo ay hindi ba puwede madaan?
sa maayos at maginoong usapan?
nang hindi na tuluyan pang madagdagan,
bilang ng sinusundo ni kamatayan.

Pag natapos ba ito ay tiyak na may panalo?
dahil sa palagay ko lahat tayo ay talo.
rebelde, sibilyan, musmos at sundalo,
mga buhay nila'y nabago na panigurado

Darating pa kaya ang umagang inaabangan?
Bala pa kaya ay titila pa sa pag-ulan?
Ang araw na hinihintay na wala nang mawawalan,
at lahat ay tinatamasa ang tunay na kapayapaan.

photo and words by: jeklog
@ Lucban, Quezon

Kapitan

2009-08-24T20:32:00.001+08:00

Trabaho, Pera, Ginhawa, Tagumpay
ilang mga bagay na nais mapasakamay,
mangilang mga mithiing sa isip ay tumatakbo
habang rumaragasa itong tren na nasakyan ko

Sa gitna ng bilis ng buhay ngayon,
biglang nagkaroon ng tanging pagkakataon,
hirap na naranasan ay muling tingnan
at pagplanuhan naman ang pagharap sa kinabukasan

Bakit tila masalimuot ang binabaybay,
riles na tinatahak ng aking paglalakbay,
pasakit, dusa, sakripisyo ay panay
pag-angat ay parang hindi ko magamay

Ngunit habang binabagtas ang bakal na hinabi
aninag ko sa bintana ay sa akin may sinabi
pera pa sa pag-iisip mo ng hinaharap at nakaraan,
bakit hindi mo muna pagtuunan yaong kasalukuyan

Ako'y natauhan at nagbalik wisyo,
may mga pinanghahawakan pa pala ako,
imbes na umungot at sa poon ay magreklamo,
ba't di pahalagahan ang kung anong meron ako

Napangiti habang nakatunganga sa kawalan,
natuwa sa mga bagay na napag-isipan,
nang biglang ang tren ay prumeno,
hayan na pala ang istasyong bababaan ko

Aking naitaas antas ng aking kamalayan,
sa pakikipagsiksikan pala'y meron ding nmatututunan,
pagninilay ay siyang aking nakamit,
habang yaong mga kamay sa kapitan nakasukbit

photo ang words by: jeklog

@ MRT

Tambuhay

2009-08-23T19:14:00.002+08:00

Bum, Taong Bahay, Antay, Butas-bulsa
Pinagdadaanan ng taong patuloy na umaasa
na propesyong tinapos at kinuhang kurso
ay sa wakas mabibiyayaan siya ng trabaho

Minsa'y ang isip ay dumadalawa,
napiling pag-aralan ay tama ba?
sapagkat matapos igapang at paghirapan,
ay tila wala pa ring kinahahantungan

Umaasa na balang araw magdulot ng yaman,
pero minsan ang loob na rin ay pinanghihinaan,
kagustuhang kinabukasan ngayon na ay masimulan
pero balakid ang trabaho'y kawalan

Maghahanap na lang ng lakas na harapin
itong problemang di ko maubos isipin
ayokong magtagal ang ganitong buhay
nawa'y sa madaling panahon ay matigil na ang pagiging tambay

photo and words by: jeklog
@ Lucban, Quezon

Sigasig Sagisag

2009-08-22T18:34:00.004+08:00

Watawat, Bandera, Marka, Bandila
Matayog na iwinawagayway, simbulo ng bansa
Bantayog ng kalayaan, kasarinlan at diwa,
Nasyonalismo, ito ang natatatanging tanda

Ngunit sapat ba ang kaalaman at pagkilala?
Hanggang dito na lang ba ang siyang pag-alala?
kasi sa bawat pilantik nitong makulay na tela,
ay hinaing na kumilos at makiisa

Makiisa sa paghihikayat ng pagmamahal sa bayan,
pagdidilig ng binhi sa lupang tinubuan,
pagbabalik loob at tiwala sa sariling tahanan,
muling buhayin paniniwala sa liping kinalakihan

Ito ay ilan sa hamon nitong sagisag
na nawa'y pagiging makabayan muling maihayag,
ipagmalaki pagiging Pilipino sa buong daigdig,
Simulan sa sarili, ang pagiging kayumangging masigasig

photo and words by: jeklog
@ Bonifacio Monument near Manila City Hall

Dilaw na Ilaw

2009-08-20T13:25:00.002+08:00

Demokrasya, Katahimikan, Pagkakaisa, Kalayaan
Mga konseptong walang takot na ipinaglaban
hindi tinigilan hangga't di nakamtan
Tagumpay na dulot ng damdaming makabayan

Lakas ng tao buong tapang na naipadama
Noong sila'y nagtipon doon sa EDSA
Mithiin ay nakuha ng walang kaakibat na karahasan
Unit-unting nasungkit sa santong dasalan

Lahat ng ito sino ba ang pasimuno?
kundi ang unang Pinay na pangulo
na sakabila ng hinhin ay walang katapat ang tatag
Pagi-ibig sa Diyos at sa bayan kanyang kalasag

Sa bayan ay patuloy siyang nanilbihan,
hanggang siya'y naratay sa karamdaman
Payapang nilisan, mundong ginalawan
misyon na dito pinaubaya na sa mamamayan

Minahal ka ng lahat hindi dahil sinabi mo
Kundi dahil ito'y aming ginusto
kaya sa pag-alis mo huwag ka nang mag-alala,
dahil tunay na hindi ka nag-iisa

Nawa'y sa kanyang tahimik na pagpanaw,
huwag sanang mapukaw regalo niyang ilaw
kung anuman ang tinatamasa ay sa kanya natin tanaw,
sa kanya, doon sa babaeng nakadilaw

Hanggang sa muli Tita Cory. Salamat. Salamat...

photo and words by: jeklog
@ Quezon Avenue, facing EDSA

Paglasap sa Ulap

2009-06-08T14:32:00.001+08:00

Pangarap, Mithiin, Panaginip, Tagumpay
Ilang mga bagay na gusto mong mapasakamay
kaya pagtitiyaga ang iyong pinagtiyatiyagaan
upang buhay mo ay may patunguhan

Oo nga't mga musmos pang naturingan,
bata pa sa mata ng karamihan,
pero sa kanila sisibol ang bukas
darating din ang panahon na lalabas kanilang gilas

Pero ngayo'y nagbubuo pa lang ng kanilang mga gusto
Namimili pa at unti-unting natututo,
Lawak ng kaalaman ay tila makitid pa,
balang araw potensyal nila ay di na madidipa.

Kaya pabayaan mo muna sila mangarap,
Hayaan munang lahat sa utak ay maganap
Ibigay sa kanila ang sarap ng paglasap
Pagtamasa ng natupad na mithiin sa ulap.

photo and words by: jeklog
@ Pacita Complex, San Pedro, Laguna

Mani-Obra

2009-06-07T14:28:00.002+08:00

Adobo, Nilaga, May balat, Wala
Halo-halong luto at paghahanda
nitong tumpok ng pagkaing dala,
na pinagkakakitaan ko at ng aking pamilya

Sa umaga'y abala na sa pamimili,
ang anak nama'y handa na, kawali ay nakasindi,
ilang bahagi ay lalagain sa tubig na kumukulo,
ang iba'y sa mainit na mantika iluluto.

Tsaka ilalako sa buong maghapon,
mga produktong hindi madali matipon,
makikita kami sa kung saan-saan,
sa kalsada, bangketa, bus at sa kung saan man datnan.

Nawa'y mga tao'y tangkilikin,
maning itinitinda, inyong bilhin,
Obra ko tong mababansagan,
sapagkat ang paghahanda nito ay pinaghirapan

photo and words by: jeklog
@ Lucban, Quezon

Sarang-Gulang

2009-06-06T14:22:00.001+08:00

Kaalaman, Abilidad, Talino, Pagkatuso
Mga bagay na itinuturo ng karanasan ng tao,
habang tumatanda, lalong pinalalawak
dunong na kinakain ng gutom na utak

Pero minsan hindi sapat itong karunungan,
para ang buhay sa mundo ay maisahan,
minsan kailangan din ng pagka-maabilidad
at gamitin karanasan at edad.

Kaya bata makinig ka sa aking salita
minsan tagumpay ay hindi palagi nakukuha
sa paraang madali at patas sa madla
minsan ito'y nadadaan sa kapalan ng mukha

Minsan upang maging matayog lipad ng saranggola.
ay kailangan ding maging tuso at maka-isa
malungkot mang ihayag na mayroon ding pakinabang,
ang paggamit ng kakayahang mang-gulang

photo and words by: jeklog
@ University of Santo Tomas Soccer Field, Espana, Manila

Buhay Ukay

2009-06-05T14:16:00.001+08:00

Halo-halo, Bungkos-bungkos, Limpak-limpak, Ga-bundok
Samu't saring kagamitan ang dito'y naka-tumpok
lahat ng puwede pang maitinda,
ay ibebenta basta may silbi pa.

mula sa mala-osong jacket na di ka magka-mayaw kung san gagamitin,
hanggang sa sapatos na ang kapareha ay di malaman kung alin,
mga branded na short, damit at sumbrero,
na di mo rin alam kung bakit amoy nila'y pare-pareho.

Lahat dito ay bagsak presyo,
mga gamit na dating pagmamayari ng ibang tao,
patay man o buhay ang pinanggalingan,
importante ay puwede pa itong pakinabangan.

Bunga ng utak-praktikal sa negosyo,
kaya nag-usbungan ang bentahang ganito,
sa paraang ito tumatakbo ang buhay
mamamayang napapasaya sa imported na ukay-ukay.

photo and words by: jeklog
@ Kamias Road, Quezon City

Maligayang Paglisan

2009-06-04T14:09:00.001+08:00

Paalam, Von Voyage, Hanggang sa muli, Babay
Karaniwang sambit sa landas na naghihiwalay,
Lungkot at lumbay sa mga mukha ay bakas,
sapagkat may kulang na sa piling nila bukas.

Ngunit sa bansang puno ng paghihirap at dusa,
at ang pag-alis ang mainam na paraan para kumita ng pera,
Imbes na luha ng kalungkutan ang mangibabaw,
ay sapilitang ngiti na may pag-asa ang siyang tanaw.

Pag-asang sa hakbang na ginawa ay makapagbibigay,
ng pag-asenso at kaunting pag-angat sa buhay,
na sana ang kapalit ng pagtitiis ng pagkakalayo sa pamilya,
ay ang pagluwag at pagbuti ng lagay nila.

Ngayon ang sakripisyong paglisan sa bansang sinilangan,
ay siyang pinagpupunyagian upang makamtan,
hindi na iindahin ang lungkot at hirap na madarama,
sapagkat ligaya na, ang makitang mga mahal ay guminhawa.

photo and words by: jeklog
@ South Luzon Expressway

Mini Mento

2009-06-03T14:00:00.001+08:00

Bayani, Mandirigma, Dakila, Sundalo
Mga nakahayag na mukha sa rebulto,
karaniwang sila ang siyang mga tampok,
ng mga obra ng mga bantog na manlililok.

Pero limitado ba sa mga ganitong paksa?
ang sining ng pagawa at paglikha,
ng mga modelong yari sa bato,
mga tatak ng pinagpipitaganang tao?

Tignan niyo ang mga musmos,
di ba't ang sarap pagmasdan ng lubos?
Mga ngiti at saya ay walang pagpapanggap,
puro at totoo mga ekspresyong inihaharap.

Bilib lang ako sa nakuhang litrato,
dahil porma nila'y kayang tapatan anumang monumento,
itong mga bata ang siyang sumisimbulo,
pinaka payak na anyo ng kaligayahan ng tao.

photo and words by: jeklog
@ Lucban, Quezon

Key Ko

2009-06-02T12:26:00.005+08:00

Kinabukasan, Kilos, Kusa, Kabataan
Ilan lamang sa mga pinagtutuunan
nitong mambabatas na ating pinagkatiwalaan,
na siyang magbigay ng pagbabago sa ating bayan.

Ngayo'y bulong-bulungan na siya'y tatakbo,
sa posisyong ikalawang-pangulo,
ang akin eh sige nga sir, nang maipakita mo,
kung paano maglingkod at hindi magpaka-trapo

Walang ibinabandilang partido,
sawa na sa pagiging makalumang pulitiko,
Indipendiente niyang haharapin,
hamon ng eleksyong sa 2010 nakahain

Siya kaya ang hinihintay ng madla?
bayaning may gawa at hindi puro salita,
Nawa'y siya na nga ang susi
ng kaunlarang kay tagal ko nang minimithi

photo and words by: jeklog
@ Lucban, Quezon, Register and Vote drive

Pinagnilayang Kawayan

2009-05-08T00:00:00.001+08:00

Katahimikan, Kalayaan, Kapayapaan, Kasarinlan
Lahat ito ay gamay habang bumabaybay sa kawalan.
Nagkaroon ng panahon na dusa sa buhay ay balikan,
at pagplanuhan naman hirap na haharapin sa kinabukasan.

Ngunit habang binabagtas kahoy na hinabi,
aninag ko sa tubig ay sa akin may sinabi.
"Maliban sa pag-iisip mo ng hinaharap at nakaraan,
bakit hindi mo muna pagtuunan yaong kasalukuyan?"

Ako'y tila natauhan at nagbalik-wisyo.
Oo nga at may pinanghahawakan pa pala ako.
Imbes na umungot at sa Poon ay magreklamo,
ba't di ko pahalagahan ang buhay ko at ng mga mahal ko?

Aking naitaas antas ng aking kamalayan.
Sa pag-iisa pala ay bungkos-bungkos pa ang matututunan.
Ito ay aking natuklasan habang nilalakaran,
yaong lumulutang na pinagnilayang kawayan.

Photo by: Leon B. Dista Words by: jeklog
@ Wawa Dam sa Montalban, Rizal

*this entry will be a part of a project by Leon B. Dista. A collection of pictures mixed with poems that interpret or tell a story about the taken photos. The team will be composed of Dong Abay, Vin Dancel (vocalist ng peryodiko and kapatid of Ebe Dancel of sugarfree) at Cabring Cabrera (vocalist ng datus tribe) and other writers from San Beda, UST and UP.

*I am thrilled to be a part of such a project and part of my dreams is to publish one of my own. Maybe in the future I can also have my own.

Thanx Leon B. Dista

Ako'y may Alaga

2009-04-26T14:08:00.000+08:00

Tagpi, Batik, Blacky, Bantay
Ilan sa karaniwang ngalan ng hayop na kaakbay,
Mga nilalang na kasama sa buhay,
katapatan sa amo di' matatawarang tunay.

"Ako'y may alaga, Asong mataba
Buntot ay mahaba, Makinis ang mukha,
Mahal niya ako, at mahal ko rin siya,
Kaya kami ay laging magkasama."

Ito ang popular na istorya na ating natutunan,
turo pa sa atin ni Mam sa eskwelahan.
Pero sa buhay ko ay may nabuoong bersiyong bago,
Lika pakinggan nyo aking kwento.

Ako'y maraming alaga, Sa hangin ay mataba,
Sila'y aking binobomba, sa umaga tuwi-tuwina.
Mga buntot nila'y mahaba, dito ko sila hawak,
Sapagkat marunong sila lumipad kahit walang pakpak.

Mahal nila ako, Mahal ko rin sila,
pero kailangan ko sila ibenta ng mura.
Sa ganitong paraan, ako rin kanilang inaalagaan,
kasi sa kinikita sa kanila, hirap naiibsan.

Sandali ko lang sila nakakasama, kasi mabilis sila mawalan ng hininga
Pero sa saglit na napagsamahan, tulong sa akin ay di' matatawaran
Sapagkat kinakain sa araw-araw, sa kanila ko tinatanaw,
Ako ay may Alaga....Bow...

photo and words by: jeklog
@ San Pedro Highway, Laguna

TamBolero

2009-04-25T12:37:00.000+08:00

Musika, Awit, Saliw, Tunog
Ito lamang ang aking dala at handog.
Sa pag-akyat ko sa jeep na pampasahero,
dala-dala itong ginawa kong instrumento.

Instrumentong yari sa lata, goma at tubo,
sabayan pa ng ilang katutubong awit mula sa tribo.
Ito ang pangunahing gawaing pangkabuhayan,
nagbabaka-sakali na sobreng-panglimos ay mahulugan.

Mga Badjao na sa siyudad ay naligaw,
umasang ginhawa ay dito matanaw.
Ngunit pagdating dito, ilan nasama sa sindikato,
ginawang puppet upang sa tao'y manloko.

Ilan sa tulad nila ay sa pambobola ay bihasa,
pero karamihan sa kanila ay walang intensiyong masama.
Nais lamang na sa kaunting himig at tugtog ng tambol,
sa rumaragasang takbo ng buhay makahabol.

photo and words by: jeklog
@ Kamias, Quezon City

Payong Kaibigan

2009-04-24T15:09:00.000+08:00

Kasama, Kapatid, Ka-tropa, Kabarkada
Yan ang turingan naming dalawa.
Walang iwanan sa hirap at ginhawa,
Sa pagluha, pagtangis, pagkatuwa at tawa

Namulat na kami ng sabay,
sa mga bagyo nitong buhay.
Sa musmos naming edad walang ibang inasahan,
kundi ang aming madikit na samahan.

Tenga ng isa ay palaging ready,
uhaw sa mga kwento at pangyayari,
taos-pusong sabik sa pakikinig,
sa mga salitang lumalabas sa kabilang bibig.

Sa buhay ay wala nang ibang sinilungan,
kundi itong payong ng aking kaibigan,
sa ulan man o sa hagupit ng araw,
ang tanging sasakluban ko ay ikaw.

photo and words by: jeklog
@ Landayan, Laguna

Ganting-Pala

2009-04-22T12:15:00.000+08:00

Asta, Baon, Hila, Hakot
Lupang aking huhukayin ay katakot-takot.
Ilang milya pa ang bibilangin,
bago matapos inatas sa aking gawain.

Trabaho'y magbungkal dito sa tagiliran,
ng mga mahahabang lansangan,
nang maiayos daloy at agos
ng trapiko at daanang naghihikahos.

Hirap at init kaya kong tiisin,
bigat at pawis hindi na pinapansin.
Iisipin na lamang yaong kapakanan,
at ang ihahain sa hapag-kainan.

Kung ginhawa at saya sa pamilya ang kapalit,
sakit at init ay di-iindahing pilit.
Hihintayin na lang yaong bunga at ganti,
nitong pagpapala ko sa lupa ng matindi.

photo and words by: jeklog
@ España, Manila

Basur-Hero

2009-04-21T21:08:00.004+08:00

Burak, Plastik, Nabubulok, Hindi
Samu't saring mga bagay na dinadampot palagi.
Sa kung saan-saang dako ako inaabot,
nitong trabaho kong taga-hakot.

Simulain nito'y pagsabit ko sa puwetan,
Nitong truck naming sinasakyan,
tsaka kami dinadala sa bawat kanto,
nang maisakay na tinipong kargamento.

Pagka-diri ay akin nang kinalimutan,
dumi ay tinanggal na rin sa kamalayan,
ultimo ilong ko ay ginawa nang manhid,
upang sangsang at baho ay mawalan ng bahid.

Trabahong di pipiliin ninoman,
itong propesyon kong pinasukan,
pero sana sa mata niyo ay ituring ding bayani,
Bakit? kaya niyo bang mamulot ng basura sa tabi-tabi?

photo and words by: jeklog
@ Quiapo, Manila

Asong Oh-LOL

2009-04-18T08:51:00.000+08:00

Mamalimos, Mag-arikmetik, Kumanta, Magpasikat
Walang imposible sa mag-utol na si Bagwis at Habagat
Sa kung saan-saang kalye mo sila makikita sa Maynila,
Naghahasik ng ngiti, tawa at tuwa.

Kilalanin ninyo muna itong unang turuan,
Habagat ang siyang ipinangalan.
5-taon nang nagpapakita ng gilas.
Mangilang beses na rin sa wowowee lumabas.

Di pahuhuli itong tagping si Bagwis.
sa talino't abilidad hindi magpapapanis,
Medyo nahuli lang naturuan,
pero di naglaon kapatid niya'y natapatan.

Silang mga asong katuwang sa buhay,
na umaasa lamang sa donasyon na ibinibigay.
Kaya sana sa munting pagtatanghal sa entablado,
nawa'y humagalpak kayo sa pagkatuwa kahit papaano.

photo and words by: jeklog
@ Morayta, Manila

Gulong ng Palad

2009-04-17T08:43:00.002+08:00

Taas, Baba, Hirap, Ginhawa
Mga posisyon ng buhay na itinakda parang roleta.
Walang sigurado, kadalasan panandalian,
minsan nasa tuktok, mamaya muling nasa sulukan.

Kapag inayunan ka ng tadhana,
biyaya ay tila bumabaha,
pero kapag bagwis ng alat ikaw natutukan,
para ka namang binuhusan ng kamalasan.

Oo nangyayari mga bagay na ito,
walang ligtas sa ganitong proseso.
Mahirap man tanggapin at sang-ayunan,
ay tunay na may aral na matututunan.

Mag-ipon, Mag-ingat, Magpasalamat kapag ramdam ang buenas,
Magtiis, Magsikap, Magdasal naman kapag nadapuan ng malas.
Sadyang ganito ang paggalaw, pag-usad, paglakad.
nitong mahiwagang gulong ng palad

photo and words by: jeklog
@ Tutuban, Manila

Panandaliang-Aliw

2009-04-16T08:14:00.002+08:00

Ngiti, Pose, Bungisngis, Porma
Mga ayos namin ay nakahanda na.
Kaya bilisan mo ang sa amin pagkuha,
bago pa magbago ang aming timpla.

Lente mo ay sa amin iharap na,
pindutin mo na ang butones ng kamera.
Baka mamaya amin nang maalala,
sa buhay ay dinaranas na dusa.

Bago pa namin mabalikan,
yaong paghihirap na kinalalagyan,
Sana naman iyo nang nakuhaan,
Sariwa naming ngiti at tawanan.

Sana rin bigyan mo kami ng kopya,
litratong iyong kinuha,
upang kami'y may matagong alaala,
panandaliang aliw naming nadama.

Photo and words by: jeklog
@ San Pedro Plaza, Laguna

Kawalang Malay

2009-04-15T07:51:00.001+08:00

Inosente, Musmos, Bulilit, Bata
Yan ang tingin sa akin ng matatanda.
Kulang sa karanasan at kaalaman,
sa buhay ay bubot pa at walang patutunguhan.

Sa kadahilanang ito ako sa inyo lalapit.
Nawa'y kamusmusan ko ay sa wasto magamit.
Sana nga ako'y maging mumunting binhi,
na balang araw tutupad sa mga pangarap ninyong minimithi.

Kaya hinaing ko sa inyong mas may edad,
inyong gampanan ng mahusay ang responsibilidad.
Na ako'y tunay na magabayan,
na maging mapagpunyaging mamamayan.

Sana sa abot ng inyong lakas kami ay matulungan.
nang sa lipunan ay hindi maging kawalan.
Na sana'y buhay ay magkaroon ng kahulugan,
malay mo ako ang ang natatanging pag-asa ng sambayanan.

Photo and words by: jeklog
@ Tondo, Manila

Tahol Aso

2009-04-14T11:47:00.001+08:00

Quiapo, Lawton, Buendia, City Hall
Boses ko ay buong lakas ko ipinukol.
Halina't sumakay dito sa jeep na nag-aabang.
nang bulsa ko naman ang siyang makinabang.

Singko Pesos ang abot sa akin kapag matagumpay,
na nakapagpaupo ng pasaherong sasakay.
Tsaka naman lilipat sa susunod na sasakyan,
at yun naman ang susubuking pasahero'y lagyan.

Mula bukang-liwayway hanggang gabihan.
Overtime ang trabaho ng aking lalamunan.
Kahit garalgal na sa kakasigaw,
itong boses kong sa ginhawa'y uhaw.

Ganito ang buhay ng mga "barker" na nabansagan,
na sa mala-asong tahol namumuhunan.
Panalangin sa araw-araw na nagdaan.
Pulis at MMDA hindi kami pagkadiskitahan.

Photo and Words by: jeklog
@ Quiapo, Manila

Alak-dan

2009-04-13T11:43:00.001+08:00

Bilog, Lapad, Long neck. Mucho
Mangilan lang sa mga tropa't barkada ko
Bestfriend ko si Gran Ma at Emperador,
Ngunit naglaon isa-isa silang sa aki'y trumaydor.

Noo'y langit pakiramdam kapag sa kanila'y lango,
at matitigilan lang kapag meron nang sumundo.
Ang kaso ang siyang sumusundo sa akin,
ay may lambanog at papaitan ding inihain.

Tuloy-tuloy lang ang aking ligaya.
Kahit naisuka na ilang bahagi ng aking bituka,
isip ko kasi noon ay mapapawi rin ang pagkalasing,
sa kinabukasang pagmulat at pagising.

Ngunit dumating ang oras na pagbukas ko ng aking mata,
may salamin nang sa aki'y naka-kwadra.
Sa alak pala ay nalunod nang tuluyan,
at nabilang na rin sa mga nabitag ng lason ng alakdan

Photo and words by: jeklog
@ The Bar, San Pedro, Laguna

Regalo sa Pasko

2009-04-12T22:33:00.001+08:00

Bumangon, Bumalik, Nabuhay, Huminga
mga pangyayaring ina-ayon sa Messiah.
Sa ikatlong araw ng kanyang pagkakaratay,
Isang kaganapan na sa salita niya ay nagpatunay.

Simbulo ng panibagong umaga,
pagsibol ng pagpapatawad at pag-asa.
Pagbubukas-palad niya sa lahat ng nananalig,
marka ng kanyang walang hanggang pag-ibig.

Paghihirap sa wakas ay natapos na.
Bawat hagupit ng sakit ay sinalo na niya.
Upang hindi na tayo makaranas.
Pagkapako sa krus doon sa talampas.

Lahat ay magsaya sa kanyang pagbabalik.
Salubungin siya ng ngiti, yakap at halik.
Panibagong buhay sa ati'y kanyang iniregalo,
sa Pasko ng pagkabuhay ngayong linggo.

Photo and Words by: jeklog
@ Sto. Rosario Parish Church, San Pedro, Laguna

Pangakong Ipinako

2009-04-11T20:45:00.001+08:00

Messiah, Tagapagligtas, Panginoon, Kristo
Mga bansag sa tanging anak ng lumikha ng mundo.
Bilang regalo niya sa mga nilalang niyang mamamayan,
patunay na kahit abo may halaga sa kanyang kaharian.

Pero sa pagdapo ng kalapating ngalan ay Hesus sa daigdig,
sa kanya'y sumalubong hindi pag-gayak at pag-ibig.
Kundi pagdurusa, hinagpis at poot.
Na sa katauhan ng mga tao na ay nanuot.

Ngunit hindi ito humadlang sa kanyang misyon.
Sa halip pangangaral ng pagmamahal ang kanyang tugon.
Pumaroon at pumarito, nagpalaganap ng salita,
salitang nagnanais iligtas ang madla.

Subalit sa ika-33 taon ng kanyang buhay,
dugo ng galit at kasamaan ang nanalaytay.
Mga tao 'y nagtipon at sabay-sabay ipinako,
yaong taong sa ati'y ibinigay at ipinangako.

Photo and words by: jeklog
@ San Pedro, Laguna

Lakbay Alalay

2009-04-10T00:00:00.000+08:00

Bali, Pilay, Lumpo, Imbalido
Iba't ibang ngalang sa akin ay ibinabato.
Tingin nila sa akin, kwenta ay wala na,
noong madisgrasya kaliwa kong paa.

Kondisyon ko ay pilit inahunan,
hanggang sa maibangon ko aking katayuan.
Paglaon ay unti-unti naring naihakbang,
yaong paa kong ilang buwan din natigang.

Sa laban kong ito ay may nakilalang kaakbay,
tinulungan niya ako sa lahat ng bagay.
Mula pagbangon at pag-ikot kung saan-saan,
hanggang muling lumapag likod ko sa higaan.

Mabuti pa tong kahoy kong saklay,
sinuportahan ako sa aking paglalakbay.
Di tulad ng mga taong mapagkutya, mapagmata,
imbes na alalayan ka, inalaska ka pa.

photo and words by: jeklog
@ Quiapo, Manila

Tunaw na Panalangin

2009-04-09T00:00:00.001+08:00

Kandila, Lata, Apoy, Puwesto
Isama mo pa ang nananalig na tao.
Ito ang siyang mga bumubuong elemento,
sa munting hanap buhay ko.

Sa pagtilaok ng manok dapat handa na,
sa tapat ng simbahan doon hihilera.
Mag-aabang ng mga taong dadaan
at siyang aalukin na madasalan.

Dasal na sa langit pinaabot sa pamamagitan,
ng pagtirik ng kandila sa latang tusukan.
Umaasang sa pag-angat ng init at usok,
mga hinaing nila'y sa pintuan ng Diyos kumatok.

Sana nga lahat ng panalangin nila'y matupad,
Nakikibahagi rin ako sa petisyon nilang hangad.
Pero ang dasal ko ay sana agaran nang matunaw,
Kandila niyo para magamit ko sa susunod na araw.

phot and words by: jeklog
@ Quiapo Church, Manila

Pasyon Show

2009-04-08T15:45:00.003+08:00

Libro, Altar, Salabat, Kanta
Mga bahagi ng kinaugaliang pabasa
Pagtitipon na taunang ginaganap
Upang ipagbalik-tanaw Banal na paghihirap

Sa iba't ibang dako tao'y nagtitipon,
upang mairaos 2000-taon na tradisyon.
Walang pinipiling edad ang manganganta,
basta marunong bumasa at nakakaaninag pa ng letra.

Samu't sari rin ang tonong sinusunod,
mula kundiman hanggang sa rap na nakakalunod.
ang mahalaga ay matapos ang libro,
na naglalaman ng tala ng pagkadakila ni Kristo.

Pero minsan di na rin puro ang intensyon,
ng pagbabasa ng mahal na Pasyon.
Nahahaluan na rin kasi ito madalas,
pagpapakitang tao at pagpapalabas.

Photo and words by: jeklog
@ Pacita Complex, San Pedro, Laguna

Tumbang Preso

2009-04-07T00:00:00.000+08:00

Tattoo, Rehas, Bartolina, Posas
Buhay-parusa ay tapos na sa wakas.
Kay sarap lasapin nitong kalayaan,
Lalo na kung impyerno ang iyong pinanggalingan.

Aminado naman ako sa kasalanan ko.
Kaya pagkakasuplong sa akin ay tinanggap ko ng buo.
Pagkapit sa patalim pinasok ko noong gipit.
Kapalit pala ay ilang taong pagkakapiit.

Sa loob ay marami ring natuklasan.
Leksyon ng buhay na noo'y lingid sa kaalaman.
Nagka-oras din pumasok sa pagbabago.
at pagsisihan ang salang ginawa ko.

Ngayo'y maligaya sa tinatamasa sa labas.
at masasabing sinusubok ituwid ang landas.
Nagsisikap itumba nakaraang pagkatao,
pagkataong dahilan ng aking pagiging preso.

Photo and words by: jeklog
@ Tondo, Manila

Basbas Palaspas

2009-04-06T15:39:00.004+08:00

Itaas, Iwasiwas, Mag-antay, Matunton
at matalsikan nitong pinagpalang ambon.
Yaong binili ko na hinabing dahon,
at magsimulang umasa na ito ang tugon.

Umaasang sa pagkabasa nitong aking dala,
ay may biyaya na ring makakasama.
Dagdag mo na rin sa pamilya'y proteksyon,
laban sa iba't ibang masamang kampon.

Pero ano na nga ba ang tunay na depinisyon,
nitong gawaing ginaganap taon-taon?
Hindi ba pagsalubong sa pagdating ng Poon?
at pagtanggap niya sa inilaan na misyon?

Tila nalito na ang ilang parokyano,
sa paggamit ng tanda ng pasyon ni Hesukristo.
Imbes na alalahanin kahalagahan ng basbas,
Ginawa na lang anting-anting kanilang palaspas.

Photo and words by: jeklog
@ Sto. Niño Chapel, Greenbelt, Makati

TongBars

2009-04-05T00:00:00.000+08:00

Gupit, Ahit, Masahe, Bola
Ano pa nga ba iyong hahanapin di ba?
Sa barberya kong di mamimintis ng iyong mata.
sapagkat andirito lang sa gilid ng bangketa.

Aanhin mo nga naman ang magarbong pwesto,
kung di ka rin naman tatangkilikin ng tao.
Kaya dito ka na sa akin magpatasa,
sa kaunting hagod ko lang ay gu-guwapo ka.

Kapag mahika ko sa iyo'y nagsimula na,
gamit itong aking gunting at labaha,
Panigurado sa itsura mong bagong tabas,
mga chix magkakandarapa at di na kakalas.

Ang saklap nga lang kasi kami ay nahukuman,
na mga salita namin di na dapat paniwalaan,
kasi sa isip niyo ay walang totoong kwento,
kapag ang sumambit ay tulad kong Barbero.

Photo and words by: jeklog
@ Quiapo, Manila

Tulog na Ilog

2009-04-04T00:34:00.001+08:00

Agos, Lawiswis, Buhay, Kabuhayan
Ilan lamang sa mga salitang papasok sa iyong isipan.
Kapag nasambit, ngalan nitong anyong tubig
na kadalasa'y kapag nasilayan di mo maalis iyong titig.

Ngunit napano na nabuong larawan sa kukote mo?
Ihambing mo nga dito sa nakuha kong litrato!
Sa kapal at dami ng natipong kalat,
palagay ko malalakaran ko tulad ng nasa Banal na Aklat.

Imbes na pag natilamsikan ka eh ikaw ay sumaya,
Mapapaisip ka na bawat patak ay petri dish ng bacteria.
Sa duming binulok na ng panahon dito,
Mantakin mong ultimo kiti-kiti nagrereklamo

Nasaan na ang gising at rumaragasang ilog?
Siguro ay napahimbing na ang tulog.
Eh paano ba naman hindi ma-grogroggy at tutumba?
Eh inoverdose mo ng sleeping pills mong basura!

photo and words by jeklog
@ Tondo, Manila

Ayos Buko?

2009-04-03T00:10:00.001+08:00

Masabaw, Mala-uhog, Niyog, Matanda
Samu't saring uri ng bunga aking nakuha.
Isinakay sa kariton para itulak, ilako,
nakakarating sa kung saan-saan mang dako.

Ako'y ma-alam na sa pagbiyak
gamit itong matalim kong itak.
Sa bawat pag-taga sa bilugan kong dala,
Beinte pesos na ang siyang naibubulsa.

Sa panahon ngayon eh mahirap makabenta.
Marami rin kasing kakumpitensiya.
Andiyan ang softdrinks, ice tea atbp.
kaya kailangan ko kumayod ng extra.

Ayos din lang naman trabaho ko,
propesyong binubuhay ng buko.
Kung minsan di maka-ubos kaya noo ko'y kunot.
Yaong tira-tira naman ang titipunin para gawing bunot.

Photo and words by: jeklog
@ Delta, Quezon City

Lingkurang Palikuran

2009-04-02T00:16:00.001+08:00

Babae, Lalaki, Ihi, Dumi
Nakakasalamuha ko sa araw at gabi.
Habang ang inyong lingkod ay umiistasyon,
at pangangasiwa sa banyo ang kanyang misyon.

Pangongolekta ng kaunting barya ang trabaho,
kapalit nito'y pagpapanatili ng malinis na inodoro,
paglalampaso ng sahig na may tulo-tulo,
pagtanggal ng sangsang, panghi at baho.

Palagay mo, kailan malakas aking mercado?
Tama! kapag tag-ulan at nilalamig ang tao.
atsaka nga pala kapag sobra ang sikat ng araw,
kasi yung iba balik ng balik kasi binabalisawsaw.

Mali mang gawain kung iyong pag-iisipan,
kasi ang pati public toilet pinagkakitaan.
Pero tanong ko lang sa iyo kaibigan,
makakapagbawas ka ba sa kadiring palikuran?

photo and words by: jeklog
@ Ayala Avenue, Makati City

Patay Buhay Tulay

2009-04-01T00:34:00.000+08:00

Tapang, Tibay ng loob, balanse, kawalan ng kabog
kapag ika'y dinaga puwede kang mahulog
sa trabahong pag nagka mali, utak mo'y sabog,
kinabukasa'y durog, katawan lasog-lasog.

Yan ang sugal dito sa aming larangan,
na pinasok ko na rin kaysa walang mapasukan.
Ok lang yan, sa pag tulay nama'y may kasama ako,
ang kaso pag nagkataon, di lang isa ang laglag kundi tatlo.

Takot sa taas ay natutunan nang ibalewala,
tiwala sa kasanayan ang aking kasangga.
Simple lang naman, para lang naghahabi,
na gamit ay mahabang bakal at hindi tali o pisi.

Ito na ang gawaing sa'kin bumubuhay,
na maaari ring sa akin ay pumatay.
mas mabuti naman magtrabaho kahit delikado,
kaysa maging tambay at palamuning tao.

photo and words by: jeklog
@ Matalino St, Quezon City

Pamana

2009-03-31T00:00:00.000+08:00

Luho, Alahas, Lupa, Pera
Materyal na bagay noo'y ako'y sagana.
Noong panahon na ako'y napamanahan,
at sa salapi ay di malaman paglalagyan.

Sa Alta de Ciudad ako noon nanahan,
di naalis na walang sasakyan.
Gastusin ko'y kaliwa't kanan
at sa pagwawaldas hindi mapigilan

Habang ako'y nasa tuktok,
di namalayang pundasyon ko pala ay marupok.
Imbes na magpundar at siyang nag-ipon,
Naglustay, gumasta at estado itinapon.

Sa kasalukuya'y said na ang kayamanan,
daga nga ay mas maganda ang katayuan.
natira na lang eh kahon-Kahon at Sako-sakong "Sana"
pamana ko'y saan na kaya napunta? (wala na)

Photo and words by: jeklog
@ Delta, Quezon City

Photo Kalye

2009-03-30T00:01:00.000+08:00

Tao, Pagbabago, Dokumentaryo
Adhikain nitong natatanging grupo.
na pilit tinatahak landas na di pansin,
na responsibilidad din ng bawat mamamayan kung tutuusin.

Sumasabak sa digmaan na ang tanging sandata,
ay puso, konsensiya at lente ng camera.
Pokus ay maiiangat kamalayan ng lipunan,
sa pamamagitan ng mga nakuhang larawan.

Sa bawat pitik ay may kaakibat na aksyon,
kilos na sana'y maibsan namataang sitwasyon.
Bawat putok ay siyang nagnanais,
bawasan ang luha ng bansang tumatangis.

Mga Taong tumutulay sa pagbabago gamit ang dokumentaryo,
Layon makapagbinhi ng mapamulat na kwento.
Sana sa mga munting bagtas na ito naihayag ang mensahe,
Misyon ng grupong binansagang PHOTO KALYE.

photo and words by: jeklog
@ Tondo, Manila

* my gratitude to these people for just merely being them. (kalyetographers in action)

Anak ng Sitio Magdalena

2009-03-29T09:51:00.005+08:00

Eskinita, Barong-barong, Tulay, Estero
Bumubuo sa lugar na kinamulatan ko.
Pinagtagpi-tagping lungga aming tirahan,
walang bakanteng sulok na di napakinabangan.

Mangilang beses na ring sinuri ng panahon,
magmula sunog hanggang sa demolisyon.
Ngunit heto't tirik pa rin, patuloy na lumalaban,
kapit-bisig na nakikibaka bawat mamamayan.

Marahil yaong pangalan ay may kinalaman,
sa aming magkadugsong na swerte't kamalasan.
Maaaring tulad din ni Magdalena, lipunan kami'y binato, ipinagkanulo
Ngunit kahawig din niyang di namatayan ng pag-asa sa pagbabago.

Tadhana ma'y pilit kaming himukin,
ginhawa sa buhay ipagkait man sa amin,
walang puwedeng dumurog sa aming pagkatao,
mga taong sama-samang nananahan sa nagkakaisang Sitio.

photo and words by: jeklog
@ Sitio, Magdalena, Tondo, Manila
Thanks to PHOTO KALYE

Tagasalo

2009-03-28T00:16:00.000+08:00

Mommy, Mama, Inay, Nanay
Mga palayaw at tawag sa ilaw ng bahay.
Kay rami pang ibang puwedeng pangalan,
Pero ang sa akin ay iba, kaya dahilan ay pakinggan.

Tagasalo ang siyang nais kong ibinyag,
sa ina ko ay gusto kong ibansag.
Negatibo man ang konotasyon nito,
Pero marapatin niyong ihayag ko ilan sa mga rason ko.

Tagasalo siya sa pagsalo sa akin kung ako'y problemado,
sa sobrang ligaya ko ay siya rin ang nais kong sumalo,
Tahanan ay ramdam kapag siya ay ka-salo,
Bituka ko'y mala bodega kapag siya ang naghanda ng salo-salo.

Lahat ng pagsubok ay nakakayanang harapin,
dahil alam kong sa likod may naka back-up sa 'kin.
Ang tanging ina kong Tagasalo,
Na alam kong ok na lahat kapag nakapulupot sa akin kanyang braso.

photo and words: jeklog
@ UST Fields, Espana, Manila

Kapa sa Dilim

2009-03-27T00:00:00.001+08:00

Kuwerdas, Tono, Tipa, Nota,
Lahat may kaugnayan sa instrumento kong pang-musika,
na nagbigay sa akin, tira-tirang pag-asa,
na mundo pala'y may natatangi pang ganda.

Gumuho ang lahat nang kadiliman ang nanaig,
Liwanag, tuluyang iniwan aking daigdig.
Noo'y galit sa tadhana ang sa akin ay bumalot,
bawat araw napuno ng hinagpis at poot.

Isang araw nakahawak ng instrumentong kurbada ang hubog,
kaagarang ang loob ay nahulog sa kanyang tunog.
Nagpunyagi upang matuto kahit paano,
Nagtiyaga habang may nagtuturong tao.

Ang aking pagkapa sa dilim ay nabigyan ng rason.
Pagkapa pala sa musika ang tugon,
Bulag na musikero man akong naturingan,
Nakakita naman ako ng tunay na kaibigan.

photo and words by: jeklog
@ EDSA-Kamuning, Q.C.

Papa Jack

2009-03-26T00:30:00.003+08:00

Pila, Antay, Sakay, Pedal
ganyan daw ang buhay ng tatay kong mahal.
Nagpapawis, nagbibilad para may mapakain,
matugunan ang pang araw-araw na gastusin.

Sabi ni ina sadyang masipag si ama,
marahil ito daw ang nakapagpa in-love sa kanya.
Mukha man daw niya ay mukhang sanggano,
pero sa loob nama'y marangal na tao.

May tiyaga, malasakit at paninindigan,
katangian niya kahit limitado ang napag-aralan.
kaya laging paalala ni Mama ang tamang sukat ay di sa mukha,
sipatin mo rin ang kakayanang magmahal at mag-aruga.

Yan ang Papa ko na "Pinapa" rin ni Mama,
mukha mang pinaglihi sa kahirapan ay ipinanagmamalaki namin talaga.
Binubuhay kami sa pagpapakahirap sa pagpapadyak,
Siya ang Daddy ko, ang aming Papa Jack.

Photo and words by: jeklog
@ National Hi-way, San Pedro, Laguna

Kung Doktor

2009-03-25T00:00:00.001+08:00

Ayala, Ortigas, Cubao, Monumento
Pang araw-araw na ruta ng biyahe ko,
Trabaho'y tagahakot ng pasahero,
sama mo na rin paniningil sa mga ito.

Bihasa sa pag-ipit ng pera sa daliri,
dalubhasa dapat sa pagbibilang at panunukli,
sa pagkakatayo'y di basta-basta natitinag,
balanse ay may sa-pusa ang tatag.

Nangarap din naman ako noon,
ng mas matayog na ambisyon,
ambisyong makaharap sa pasyente,
at hindi ang mangolekta ng pamasahe.

Pero lakbay ko ay sinamang-palad,
Panaginip ko'y di maabot, sumobrang taas ang lipad,
Kung kaya lang sana maging Doktor na manggagamot,
Ngayo'y hindi sana kunduktor na sa tiket ay taga-abot

photo and words by: jeklog
@ Dela Rosa Transit, Ayala Terminal

Nakaw na Sandali

2009-03-24T02:02:00.001+08:00

Nagmamasid, Nanunuod, Daha-dahan, Kikilos
Bawat galaw pag-iisipan, ang plano i-aayos,
para pinupuntiryang bagay aking makamit,
mapasakamay na ninanais na langit.

Tiniyak munang walang nakatingin,
tsaka unti-unting nag "move-in"
Ngayon ako na'y nakapuwesto,
dali-daling ikinasa ang sandata ko.

Mabilis na umiscoop gamit ang kutsara,
isinubong buo sa loob ng bunganga,
sabay palit ng itsura na patay malisya,
pero hmmm..parang sa labi ko'y may natirang ebidensya.

Sandaling ligaya ang sa akin ay naidulot,
ng aking pagkaing mabilisang hinablot,
Pero napahiya sa pagiging magnanakaw,
naturingan tuloy na kalatog-pinggang matakaw.

photo by: JM (my brother) Words by: jeklog

@ our abode. Pacita Complex, San Pedro, Laguna

Karga Niño-sino?

2009-03-23T01:24:00.001+08:00

Balikat ko, Binti mo, Kamay mo, Santo
koneksiyon ng mga bagay dito sa litrato.
Ano nga bang depiksyon nito?
Implikasyon na maiaayon sa buhay ng tao?

Pinoy daw ay likas na relihiyoso,
binibihisan, inaalagaan ultimo mga anito,
kay rami pa ng paraan ng pagpuri,
Penitensya, novena at piyestang sari-sari.

Palagay ko'y ito'y pahiwatig lamang,
malalimang pagmamahal at respeto sa may Lalang.
Lahat ito'y iba't ibang pagpapakita
tunay man o huwad na pananampalataya.

Pero sa paggawa mo ng mga hakbang na ito,
Alin ba ang tama sa mga tanong ko? Sino ba kung sino?
(Ikaw ba ang umaaruga kay "Santo Niño"?)
(O siya ang kumakarga sa iyo?)

photo and words by: jeklog
@ Brgy. San Antonio, San Pedro, Laguna

Kalakal-Kal

2009-03-22T01:00:00.001+08:00

C2, Plastic na bote, Bakal, Coke in Can
mga bagay na itinapon mo sa basurahan.
kala mo'y pagkaubos ng laman kwenta'y kasama,
pakinabang sa mga ito'y siya ring wala na.

Pero sa aming may kahoy na manibela,
na buong lakas nagtutulak ng karitela,
kalat mo'y may katumbas na sentimo,
ikabubuhay na namin kapag naka-kilo.

Buti na lang kasama ko si utol,
kaututang-dila ko sa aking paghahabol,
napapawi hirap, pagod at pagka-hapo,
paghahanap ng ginto ay para lang laro.

Ganito tumatakbo ang pangangalakal
bawat tapuna'y sinusuyod, kinakalkal
nagbabaka-sakaling swertehin din at makaipon,
pampaayos man lang nitong aming kariton.

photo and words by: jeklog

@ Canlalay, Biñan, Laguna

Alsa-Balutan

2009-03-21T06:01:00.002+08:00

Balut, Penoy, Mani, Chicharon
Tilaok ko 'pag kagat ng dapit-hapon,
mga katagang buong lakas kong sinisigaw,
umaasang may mga lasenggong mamakyaw.

Hapon pa lang ay dedelehensya na ng basket,
doon sa Bulacan Public Market,
Buslong puno ng itlog na pang-lako,
Iuuwi sa Cubao nang doo'y maluto.

Bago lumarga ay saglit munang magdadasal,
lakad nawa'y hindi bulilyasuhin ng kalabang-mortal,
mga asong ulul na ulol magsitahol,
na wala na atang ibang libangan kundi sa tulad namin manghabol.

Ilang taon na rin akong umaasa,
sana nama'y bulsa ko na ay umalsa,
nang mabalutan naman ng konting ginhawa
sarili kong tila yata wala ng pahinga.

Photo and words by: jeklog
@ Kamias, Quezon city

Chess-ta

2009-03-20T01:42:00.004+08:00

Touch move, Itim, Puti, Mate
Bawat galaw pinag-isipang mabuti.
Upang tiyakin ang tagumpay ng stratehiya,
dito sa digmaang utak ang sandata.

Madalas man sa joke ay laman,
sport daw na kung saan di ka masasaktan.
Pero palagay ko mas masakit maramdaman,
Na ika'y "nag-utak *Biya" dahil naisahan.

Saan ginaganap aming torneo?
Kahit saan! basta may board na piyesa'y kumpleto.
Sino ang mga pwedeng lumahok?
Kahit sino basta maalam at may talim ang tuktok.

Dito sa kalsada kung saan,
bulalo namin ay natatasahan.
Ang Siesta naming naturingan
Sa chess na namin nailaan.

photo and words by: jeklog
@ Don Quijote Overpass, Espana

*Biya-isdang maliit ang ulo

Deter-Minisyon

2009-03-19T08:07:00.004+08:00

Hingal, Pagod, Oras, Pawis
ginugol itong lahat sa pagpra-practice,
nitong presentasyon naming inihanda,
sa kumpetisyong sa aming piyesta'y takda.

Sa labang ito, lahat ay aming sinugal
kami ang pinakabatang magtatanghal.
Kalaba'y mas nakatatanda at mas bihasa,
pero pag-urong ay sa aming diksyonaryo'y di nakatala.

Dumaan ang mga araw hanggang sa dumating na,
paligsahan na pinagpaguran talaga,
kaya sa entablado aming inihataw,
bigay todo sa pag-indayog at pag-sayaw.

Nang inanunsyo yaong nanalo,
di-nabanggit pangalan ng aming grupo.
Pero lumabas sa bawat isa pambihirang determinasyon,
sapat na para maihayag ang tagumpay ng aming misyon.

photo and words by: jeklog
@ Sampaguita Festival San Pedro, Laguna

Takatak

2009-03-18T08:11:00.005+08:00

Phillip, Marlboro, Hope, Winston
Stick at kahang nakasiksik sa aking kahon.
Isama mo pa storck at lighter kong dala,
ito na ang kalakal ko mula noon pa.

Kami ay may kanya-kanyang sona,
teritoryo kung saan kami ay pwede magtinda.
Gawain ito naming mga tindero,
pakita ng paggalang sa kapwa at pagrespeto.

Baybay-tawid sa mga kalsada,
alok-habol lalo na sa mga namamasada.
Ang stop light sa amin baligtad ang takbo,
sapagkat ilaw pag nag pula, business namin ay go.

Marami kaming makikita mo,
may ahente kami sa bawat kanto.
Hanggat sunog-bagang paninigarilyo ay talamak,
sa kalye'y di mawawala tunog ng aming takatak.

photo and words by: jeklog
@ Araneta St, Quezon, City

Pamilyar ako?!

2009-03-17T06:00:00.001+08:00

Kailan, Saan, Sa aling paraan, Paano?
Di na nabatid kung bakit napunta dito.
Pagmulat ng mata'y buong mundo'y tila nagbago,
ni di ko na rin namalayan ang pagkakaupo ko dito sa kanto.

Ganito na kaya ang buhay ko kahapon?
Nagising na ni kaunting memorya ay di nakaipon?
Siguro makakadama lang ng kahit kakarampot na kasiyahan,
kung maaalala kahit man lang aking pangalan.

Pero kahit sa nagdaan ay walang katiyakan,
alam ko may misyon akong dapat gampanan.
Dahil sa ngayo'y meron pa ring pinanghahawakan,
ang mapanatiling buhay ako sa kasalukuyan.

Nang makaharap ang sarili gamit ang matang kirat,
Nagulat nang maaninag babaeng buto't balat.
Nang masulyapan ang mukhang nabuo sa baso,
Bumigkas ng: "pamilyar ata itong taong ito, hindi kaya siya ang tumandang ako?"

photo and words by: jeklog
@ E.Rodriguez Q.C.

Sampag-Kita

2009-03-16T06:00:00.000+08:00

Dampot, Tuhog, Buhol, Tinda
ganito ang takbo ng pang araw-araw kong istorya.
Trabahong minana pa kay nanay at tatay,
pakiwari ko'y si Jr. ganire rin ang dadatnang buhay.

Halika at iyong pakinggan,
umupo ka muna at makipagkwentuhan,
nang iyong malaman kung saan napunta,
sampung-piso mong inabot kanina.

Sa madaling araw ay nakikipag-unahan mamili,
ng isang tabong bulaklak sa Camachile.
Tutuhugin, bubuhulin at tsaka ibebenta,
dun sa kalsada habang si Jr. ay karga-karga.

Simple lang naman ang buhay namin di ba?
ang buhay tindera ng sampaguita.
Masaya na akong masilayang may nginangata,
makitang si si Jr. ay busog at di na maputla.

photo and words by: jeklog
@ North Avenue, Quezon City

Tawag ng Kalikasan

2009-03-15T06:00:00.001+08:00

Harap, Likod, Kaliwa, Kanan
Paligid ko muna'y saglit tinignan.
Nang makitang wala masyadong dumadaan,
zipper ko'y dali-daling binuksan.

Oh pakiramdam ko ay kay ginhawa,
nang dumaloy na ang ininom ko kaninang umaga.
Pero kaligayahan ko'y biglang naantala,
nang babala sa kaliwa ko ay nabasa.

Pero kahit na yan ay kanina pang nakita,
palagay ko di rin nabago ang aking ginawa.
Dahil namulat na rin sa kultura't kasanayan,
na lalong gagawin kahit na pinagbawalan.

Di ko alam kung sa Pilipino'y likas lamang talaga to,
kasi kahit ako hindi kayang magbago.
Mas maaatim pang tawaging Puta,
kaysa sumunod sa batas na nakasulat sa karatula.

photo and words by: jeklog
@ A.H. Lacson St, Manila

Basahan

2009-03-14T00:00:00.001+08:00

Salita, Balita, Showbizz, Tsismis
Ilan lamang sa masasagap sa pagtingin ng mabilis,
sa kapirasong papel na aking nadampot,
habang sa basuraha'y ako'y namumulot.

Makahiga nga muna dito sa aking sofa,
Sofa, sa sala kong kalsada,
susubuking madugtungan naman ng konting dunong,
utak kong sa Rugby ay natutong.

Mga pahina'y isa-isa kong binuklat.
Mga letra'y malagkit na hinipo ng matang mulat.
Ngunit bakit ang pagbabasa'y napunta sa pagkakamot?
Mukha'y nagusot at noo'y nakakunot?

Tila yata ako ay may nalilimutan,
ang rason kung bakit wala akong maintindihan.
AH! ako nga pala'y sa pagbabasa'y di naturuan,
kaya sa sino mang mapadaan, maaari mo ba akong Basahan?

photo and words by: jeklog
@ Dapitan St., Manila

Ta-huli-ka!

2009-03-13T08:29:00.005+08:00

Arnibal, Sago, Baso, Taho
yan ang elements ng munting business ko.
Makikita mo ako kung saan-saang kanto naglalako,
Sabay sigaw ng "Bili na kayo, mainit, bagong luto!"

Ok na sana takbo ng aking negosyo,
may pera na ring pumapasok kahit paano.
Hanggang ma-feature kami sa balita,
produkto daw nami'y sinalaula.

Baboy at di sanitaryo daw naming ginawa,
sa maling paraan daw inihanda.
Itong aking tinitindang mahal ng masa,
regalong pangkabuhayan sa'min ng soya.

Ang akin lang ay bakit naman kami nilahat nyo,
lahat tuloy ng ka-baro ay apektado.
Paano naman kayo nakakasiguro na lahat ng magtataho ay ganito?
ang pagkahuli ba ng isa ay applicable sa tatlo?

photo and words by: jeklog
@ P.Noval, Manila

Kwentong-Ketong

2009-03-12T09:37:00.003+08:00

Tira-tira, Barya, Pera, Limos
Di ka na ba naawa sa kondisyon kong kay lunos?
Mukha ko'y bakil-bakil, katawa'y puno ng galos,
Para akong sigarilyong unti-unting nauupos.

Aray! noong nabato ng tanod sa overpass,
Sabay pukol din ng salitang "P.I. mo wala ka ng Lunas!"
Mang-gagancho raw ako't parte ng sindikato,
Na kumikita sa panloloko ng tao.

Ang tanong ko sa kanya, "ano pa bang meron ako?"
Yaman kong sugat na puno mula paa hanggang noo?
Mula magkaganito wala na ngang madama,
Ultimo haplos o anino man lang ng pamilya.

Ilan lang to sa mga palagiang kwento,
ng mga di pinalad na nilalang katulad ko.
Ganito ang dinanas sa paghingi ng tulong,
ng taong hindi pinangarap magka-ketong.

Photo and words by: jeklog
@ España, Manila

Bungang-Uhaw

2009-03-11T09:31:00.001+08:00

Purified, Filtered, Malamig, Mineral
Panigurado pagod at uhaw mo ay tanggal.
Dito sa mangilang boteng aking dala,
Na ni ako di alam kung malinis talaga.

Ako ay ilan sa mga taong masaya,
kapag nakikitang ang araw ay tirik na.
Kasi talamak na ang panunuyo ng lalamunan,
at ako nama'y magkakaroon na ng pang-laman tiyan.

Sa tagal ko nang ganito, tinatablan ay hindi na,
ang init ang polusyon ay di na iniinda.
Di na rin pansin ang pawis na tumatagaktak,
Nagsisilbi pa nga itong aking sun block.

Kaya haring araw lalo ka pang magalit!
Bayaang ang init mo'y umabot sa kanilang singit!
Dahil ang bunga ng kanilang pawis at pagka-uhaw,
Pamilya ko'y maitatawid nanaman ng isa pang araw.

photo and words by: jeklog
@ kalaw, Manila

Nurse - Plus

2009-03-10T10:00:00.000+08:00

Nurse:
Pulse rate, temperature, respiration, BP
mga bagay na paulit-ulit ko ng ginagawa sa duty.
Bad Trip talaga! Nakakasawa na!
Kailan ba ako makakaalis ng Manila?

jeklog:
Teka-teka nga ineng ako'y may matanong lang sa'yo,
bakit baga kay rami mong reklamo?!
Buti ka nga naka-score na ng trabaho!
Palagay mo ba meron yung tao sa likod mo?

Manong: Oo nga! (sabay ipit ng envelope sa kili-kili at nangarap uli magka trabaho)

jeklog muli, para sa masa:
Sa "buhok ni adan" na kumuha ng nursing,
sakadahilanang mapuno ang bulsa ng "kumakalansing".
Babala: di ganun kadali mag-aral nitong Agham,
para lang makatapos ka at mag-buhay BUM.

Minsan dadaan sa utak mong hindi nursing ang lunas,
dahil sa Linsiyak na retrogression at Nurse Surplus.

Manong na bahagyang lumingon pero abalang mag text:
E bakit mo kasi pinasok yaang ganyang propesyon?
Minahal mo kasi to sa maling rason.

Nurse at jeklog: sabagay...hehe

photo and words by: jeklog
@ Taft Avenue, Manila

People's Ch-U-AMP!

2009-03-09T09:23:00.000+08:00

Leadership, Hope, Wisdom, Strength
all of these epitomized in the way I stand.
All you people should listen in awe,
as I clench my fist and then open my paw!

But behind the Herculean-Solomonish character,
is the Me that still sits in wonder.
How should the gears in me tick?
Should I inspire or make them sick?

I am put by the populace in a position,
to be an emblem of headship or to immerse in corruption.
Is this really how the politics is built?
A life torn between public service and personal guilt?!

Now I speak strong and weak in ambivalence,
but the show must go on, and be the face of reliance.
I'm seeing erratic portraits as I am in this ramp,
In their eyes, am I A People's Chump? or The People's Champ?

photo and words by: jeklog
@ Sampaguita, festival, bayan ng San Pedro

Pananampala-Taya

2009-03-08T22:00:00.000+08:00

Kinse, Bente-Dos, Otso, Singko
kulang pa ng dalawa aking set ng numero.
Alin pa kaya sa mga inaalagaan ko,
ang magdadala sa kin sa milyones na premyo.

Itong hawak kong nag-iisang bente pesos,
Na tunay na pinaghirapan ko ng lubos;
pagkain na sang maisusubo,
ang pamilya'y ma-T-Treat na sa turo-turo.

Sa gawain kong ito tawagin mo ng hangal,
dahil tanging pang-tustos dinala pa sa sugal.
pangarap na pinagdasal, inilaan na lang sa legal,
kaysa naman gumawa ako ng bawal.

Ang pananampalataya ng isang pala-Taya,
Ay di matatawarang sadya.
Marahil ito na lang ang kanyang pag-asa,
Na makibahagi sa bulsa ni Ginang Gloria.

Photo and words by: jeklog
@ Lotto outlet, Pacita Complex

The Urban Legend

2009-03-07T21:22:00.000+08:00

Rhyme, Reason, Love, Passion
All of these evident in the Master's vision.
A calling that started with a mission,
that through the Rap Culture He can unite the nation.

Francism was the name of the said notion,
that transcended every video, Tv and radio station.
It stood the test of a 2-decade season,
and now the fight is in the heart of the next generation.

Dread was the feeling when he caught the Big C,
but the battle waged on as he struggled gallantly.
He zealously proved that disease is no hindrance,
up until even that noon that he made it in heaven's entrance.

He has the contemporary-new-age hero's thought
well, others would tag him as the Urban Patriot.
but for the jotter he now transcends,
as the new definition of an Urban Legend.

Rest in peace Sir Francis, who you are will echo in eternity.

image and words by: jeklog

Abot-Kamay

2009-03-06T21:45:00.000+08:00

Index, Middle, Ring, Pinky
Kapag ika'y naabot meron nang ipagmamalaki.
"Nakahawak na ko ng kamay ng celebrity!"
Kaya sa tropa, ako na ay matindi!

Ayun na! tanaw na ang parada ng mga model!
Maka-akyat na nga sa ibabaw ng tricycle.
Tumabi-tabi ka nga muna diyan Bok!
Kung ayaw mong masikaran at masuntok!

Ginawa ko lahat para pahabain,
mga bisig at daliri kong patpatin.
Ngiti ko'y di mawari dahil halos ramdam ko na,
dampi sa palad ko ng babaeng maganda.

Ngunit 'pag tinamaan ka nga naman ng malas!
Parada'y kay bilis lumipas.
Hanggang dun lang din pala sa stage na "Abot-kamay"
Hanggang dun lang pinalad ang pangarap kong tunay.

Photo and words by: jeklog
@ Landayan, Laguna

Bahay-Buhayan

2009-03-06T00:34:00.000+08:00

Mama, Papa, Ate, Kuya
Stereotypical members ng pamilya.
Pero ngayon si ate ay Nanay na,
at ang Papa naman ay si Kuya.

Psst Huuy! Kunin mo nga muna tong si baby,
Nang aking mapractice aking marketing strategy.
Kasi pag di nakabenta ng isa, dalawang dosenang candy,
pang-gatas ni Muymoy wala tayong pambili.

Sige Kuya, akina na muna, at alam ko sa akin tatahan siya.
Dahil ako na rin ang kinagisnan nyang ina.
Pero huwag na wag mong kalilimutan HA!!
Pang Tong-its na Nanay at pang toma ni Papa.

Lintek na buhay nga naman ito!
Kala ko lahat ng ito'y isa lamang laro!
Pero bakit ba nagkaganito?
Bahay-bahayan namin ay nagkatotoo!

photo and words by: jeklog
@ Lawton, Manila

Tengang Kawali

2009-03-05T14:35:00.000+08:00

Pagasa, Saya, Tuwa, Ligaya;
Lahat ito kita mo sa'king mata.
Habang takip ko ang aking tainga,
at gulo sa paligid ko'y di rinig pansamantala.

Di ko parin naman masyado pansin,
hirap ng buhay kong tatahakin.
Kaya nga sa laro muna ako abala,
Habang ako ngayo'y musmos pa.

Di ko pa alam ang sa aki'y mangyayari,
pagtanda ba'y giginhawa o mag bubuhay tae.
Pero sana wag muna mamatayan ng pag-asa,
Iisipin na lang palaging may bukas pa.

Pero ngayo'y ibigay nyo muna sa'kin ang sandali,
dahil ako'y nakahanap ng paraan para mapanatili.
Itong aking mumunting mga ngiti,
Sa pagiging bingi at Tengang Kawali.

Photo and words by: jeklog
@ San Pedro, Laguna

Baliw-Sawsaw

2009-03-03T23:18:00.000+08:00

Basilio, Crispin, Gloria, Obama,
sa ngayo'y wala akong pakialam sa kanila.
Ang importante ako'y maligayang nakaupo,
dito sa hacienda kong walang bangko.

Anong iyong tinitignan sa aking mukha?
Kaw ba ay may duming nakikita?
Kasi sa paningin ko nama'y wala,
Ito'y aking natural complexion, tanned lang bahagya.

Ang sama ng tingin mo sa damit ko!
Bakit? off ba? Baduy o mukhang trapo?
Kasi sa akin hindi to retaso,
Intimately designed by Salvatore Ferragamo.

Ako ang hari ng aking mundo,
akin lahat ng nasisilayan mo!
Kahit sa mata mo'y ako'y ma-babalisawsaw
Sa aking pagkakaupo sa ilalim ng araw.

photo and words by: jeklog
@C.P. Garcia St., U.P. Diliman Q.C.